Kedarnath (2018) Sinhala Subtitles | ආදරයත් එක්තරා වන්දනාවක්… [සිංහල උපසිරසි]
සොබාදහම කියන්නෙ හරි අපූරු දෙයක්. සොබාදහම කියන්නෙ මෙන්න මේකයි කියලා හරියටම නිර්වචනය කරන්න අමාරුයි. ඇයි මං එහෙම කියන්නෙ? පහල පින්තූරය පොඩ්ඩක් බලලා ඉන්නකො මුලින්ම.
කොච්චර මනස්කාන්තයිද නේද? හරිත වර්ණයෙන් දිදුලන තුරු ලතාවො… ශ්වේත වර්ණ තුශාරයන්ගෙන් ගැවසගත් කඳු පන්ති… මේ සියල්ලටම ඉහලින් වජඹෙන්නාවූ නීල වර්ණ අහස් කුස… මේ සුන්දරත්වය වචනයෙන් කෙසේ නම් විස්තර කරන්නද? ඒ චමත්කාරයෙන් සිතට දැනෙන්නා වූ සැනසිල්ල වචනයෙන් කෙසේ නම් විස්තර කරන්නද?
එහෙනම් දැන් පොඩ්ඩක් මේ පින්තූරය බලන්නකො.
අන්ධකාර, මූසල පෙනුමක්… විනාශ වෙලා ගියපු පරිසරයක්… සිත තව තවත් කලකිරීමට පත්කරවන ජායාරූපයක්… මේ අඳුරු බව, මූසල බව වචනයෙන් කෙසේ නම් විස්තර කරන්නද?
පොඩ්ඩක් ඉන්න… ඔබ මේ දැකපු ජායාරූප දෙකම එකම ප්රදේශයක කියලා විශ්වාස කරන්න පුලුවන්ද? අමාරුයි නේද? මුලින් හරි ලස්සන පරිසරයක් දැක්කා. ඊට පස්සෙ විනාශ වෙලා ගියපු මහ මූසල පරිසරයක් තියෙන ජායාරූපයක් දැක්කා. මේ ජායාරූප දෙකම එකම ප්රදේශයක වෙන්නෙ කොහොමද? එකම ප්රදේශයක ජායාරූප දෙකක් හාත්පසින්ම මෙච්චර වෙනස් වෙන්නෙ කොහොමද?
අන්න ඒ නිසා තමයි මං කිව්වෙ සොබාදහම කියන්නෙ මෙන්න මේකයි කියලා නිර්වචනය කරන්න අමාරුයි කියලා. සොබාදහමට වෙනස් වෙන්න ගතවෙන්නෙ නිමේශයයි. උඩ ජායාරූප දෙක ඕනෙවටත් වඩා ඒ ගැන සාක්ශි සපයාවි. ඔබ ඒ දැක්කේ උතුරු ඉන්දියාවේ කේදර්නාත් වල ජායාරූප දෙකක්. බොහොම මනස්කාන්ත විදියට තිබ්බ කේදර්නාත් පුදබිම අමු සොහොනක් කරන්න සොබාදහමට ගතවුනේ බොහොම සුලු කාලයයි. සොබාදහම වියරු වැටුණා. ස්භාවික විපතක් ඇති වුණා. දහස් ගණනින් ජීවිත බිලිගත්තා. අනන්ත අප්රමාණ දේපල විනාශ කලා. යලිත් සුපුරුදු පරිදි සොබාදහම තැන්පත් වුණා. හැබැයි, ඒ සුළු මොහොතට කරපු අති මහත් විනාශය නම් මෙච්චරයි කියලා කියන්න බැහැ. ඒ විනාශය තව වසර සිය දහස් ගණනක් යනතුරාවටම පවතීවි.
“ඕවා මොනවද… අච්චර අර සුනාමියටත් මූණ දීපු ජාතියක් අපි…” සමහරු එහෙම කියාවි. සහතික ඇත්ත. ජාතියක් වශයෙන් ලාංකික අපි මුහුණදීපු දරුණුතම ස්භාවික ඛේදවාචකය තමයි සුනාමි කියන්නෙ. ජීවිත හතලිස් දහසකට අධික ප්රමාණයක් රටට අහිමි වුණා. දෙමවුපියන්ට තමන්ගෙ දරුවන් අහිමි වුණා… දරුවන්ට තමන්ගෙ අම්මා-තාත්තා අහිමි වුණා… සැමියන්ට තමන්ගේ බිරින්දෑවරු අහිමි වුණා… බිරින්දෑවරුන්ට තමන්ගේ සැමියන් අහිමි වුණා… මිනිස්සු කී ලක්ශයක් නම් යන එන මං නැතුව මහ පාරට වැටුනද? වසර සිය දහස් ගණනාවක් තිස්සෙ නිසලව ඉඳපු මහ සාගරය උන්හිටි ගමන් කරපු මහා විනාශය මෙන්න මෙච්චරයි කියලා වචනයෙන් කියන්න බැරි තරමයි. ඔබගේ පැරණි දුක්ඛිත මතකයන් නැවත ආවර්ජනය කලාට මට සිය දහස් වාරයක් සමාවෙන්න ඕනෙ. ඒත්, මට කියන්න ඕනෙ වුනේ විපතක් වෙන්න රට, ජාතිය, ආගම මොකක්ද කියලා බලපාන්නෙ නැහැ. ගං වතුර හේතුවෙන් වසරකට අපේ රටේ මිනිස්සු කීදාහක් නම් නිකරුනේ ජීවිත පූජා කරනවද? නාය යෑම් වලින්, කුණාටු වලින් ආදී වශයෙන් වසරකට මිනිස්සු කොච්චර නම් මේ ලෝකෙන් සමුගන්නවද? නිකමට හිතුවද සොබාදහම ඇයි මෙහෙම කුරිරු වෙන්නෙ කියලා? කිසිම අනුකම්පාවක් නැතුව අහිංසක මිනිස් ජීවිත මේ ආකාරයෙන් බිලිගන්නෙ ඇයි කියලා පොඩ්ඩක් හරි කල්පනා කරලා බැලුවද?
ඒ ප්රශ්නෙත් එක්ක අපි පොඩ්ඩක් ආපහු අපේ අසැල්වැසි රට පැත්තට යොමුවෙමු. දිනය හරියටම 2013 ජුනි 16 වෙනිදා. මං ඔබව එක්කගෙන යන්නම් උතුරු ඉන්දියාවෙ උත්තරඛන්ද් (වර්තමනයේ උත්තරාංචල් ලෙස හඳුන්වයි) ප්රදේශයට. අතිශය රමණීය ප්රදේශයක්. අහස සිඹින කඳු ශිකර… ඒ කඳු ශිකර වසාගත් ශ්වේත වර්ණ තුශාර… හරිත වර්ණ තුරු ලතාවෝ… මේ තමයි උතුරු ඉන්දියාවෙ උත්තරඛන්ද් ප්රදේශය. උත්තරඛන්ද් ප්රදේශයේ ඛේදර්නාත් කියන්නෙ අති රමණීය වගේම, බැතිමතුන් ලක්ෂ ගණනින් වන්දනාව සඳහා පැමිණෙන ප්රදේශයක්. හිමාචල් ප්රදේශය, හර්යානා, දිල්ලිය, උත්තර ප්රදේශය, බටහිර නේපාලයේ ඇතම් ප්රදේශ, බටහිර ටිබේටයේ ඇතැම් ප්රදේශ වලට ඇදහැලුණු ධාරාණිපාත වර්ෂාව හේතුවෙන් උතුරු ඉන්දියාවෙ උත්තරඛන්ද් ප්රදේශයට බොහොම සුලු මොහොතක් ඇතුලත අති විශාල ගං වතුර බලපෑමක් ඇති වුණා. උත්තරඛන්ද් කියන්නෙ කඳු පන්ති වලින් වටවෙලා තියෙන ප්රදේශයක්. ඉතිං හිතාගන්නකො මේ වගේ ප්රදේශයකට වතුර පිරුණාම කොහොම තියේවිද කියලා. අසුරු සැනකින් කඩා වැදුණු ජල රකුසා විසින් කඳු පන්ති වලින් වටකරගත්ත මේ සුන්දර ගම්මානය, මේ සුන්දර පුදබිම ඩැහැ ගත්තා. ගණනය කිරීම් වලට අනුව එදා ජීවිත 5748ක් අහිමි වෙලා තියෙනවා. මින් 934 දෙනෙක් එම ප්රදේශයේම වැසියන්. අනික් සියලු දෙනාම කේදර්නාත් වන්දනාව සඳහා පැමිණි බැතිමතුන්. මේ ගංවතුර තර්ජනය වෙන වෙලාවෙ කේදර්නාත් නිම්නය අවට ප්රදේශයේ බැතිමතුන් ලක්ශ තුනකට අධික ප්රමානයක් හිර වෙලා ඉඳලා තියෙනවා. අවසානයේ ඉන්දියානු යුධ හමුදාව සහ ගුවන් හමුදාවෙ මැදිහත් වීම මත බැතිමතුන් 110, 000 කට අධික ප්රමානයක් ඔවුන් විසින් මුදවාගෙන තිබුණා. ඒ වගෙම තමයි, මේ ගංවතුර තර්ජනය අසල්වැසි ගම්මාන 4500 කට අධික ප්රමානයකට දරුණු අන්දමින් බලපාලා තියෙනවා. කෙසේ වෙතත්, අවසානයේ මෙය ඉතිහාස පොත් තුල ලියවෙන්නෙ, එදා මෙදා තුර උතුරු ඉන්දියාවට බලපෑ දරුණුතම ගංවතුර තර්ජනය ලෙසයි.
එදා ඒ විදියට අනුකම්පා විරහිත ජල රකුසා මිනිස් ජීවිත 5700 කට අධික ප්රමානයක් බිල්ලට අරගත්තා. මේ ජීවිත 5700 ට අමතරව මන්සූර්-මන්දාකිණි ආදර අන්දරයට සදහටම නැවතීමෙ තිත තියන්නත් කුරිරු ජල රකුසා අමතක කලේ නැහැ. එසේ නම් ඔබ සියලු දෙනාගෙන්ම අවසරයි, කේදර්නාත් පුදබිම තුල දළු ලා හැදී වැඩුණු, කේදර්නාත් පුදබිම තුලම අවසන් සුසුම් වා තලයට මුදාහරින ලද මන්සූර්-මන්දාකිණි ආදර අන්දරය ඔබ හමුවේ ගෙනහැර පෑමට…
කුමරියේ, ඔබ දුටු මුල් දිනයේ…
සත්තයි මා සිත මටම අහිමි වූවා…
නුඹගේ සිතත් නුඹට අහිමි වූ බව,
නුඹගේ වත මා හට රහසේම පැවසුවා…
ලොවක් පොලු මුගුරු ගෙන
අපගේ පිවිතුරු පෙමට එරෙහි වූවත්,
සත්තයි දුරින් හිඳ වුවත් අපි අපිට පෙම් කලා…
එනමුදු සොඳුරියේ සොබාදහමත් අප හට එරෙහි වූ කල,
අපි කුමක් නම් කරමුද?
සොඳුරියේ ඔබයි මගේ ජීවිතය…
එසේ නම් මට මාගේ ජීවිතය වෙනුවෙන් කල නොහැකි දෙයක් නොමැත…
ඔබට මාගේ ජීවිතය පුද දී,
ඔබට මාගේ ප්රාණය පුද දී,
ඔබට මාගෙ ආත්මය පුද දී,
මියදෙන්නම් සතුටින් කේදර්නාත් මව් තුරුල තුල…
අඩන්න… වැලපෙන්න… ඉකිගසා අඬන්න…
ඒත්, ජීවිතයේ අවසාන සුසුමත් වා තලයට මුසුවන තුරාවට,
මේ මන්සූර් කොච්චර ආදරය කලාද කියලා,
හදවතේ කොනක හරි මතක තියාගන්න මගෙ ආදරණීය මන්දාකිණි !!!
________________________________________________________________________________
ඉතින් උඩ සිසිල මස්සිනා කිව්වා වගේම වරෙක කුරිරු වූ මේ සුන්දර පුදබිමේ කලෙක දළුලනවා ලස්සන ආදර අන්දරයක්. මන්සූර් කියන්නේ මේ සුන්දර කෙදර්නාත් පුදබිමේ පහල සිට ඉහලට බැතිමතුන් රැගෙන යන මුස්ලිම් තරුණයෙක්. මුක්කු, එහෙමත් නැත්නම් මණ්දාකිණි කියන්නේ මේ කෙදර්නාත් වන්දනා කරන්න එන බැතිමතුන්ට නවාතැන් පහසුකම් ලබාදෙන ස්ථානයක් පවත්වගෙන යන හින්දු පූජකතුමකුගේ බාල දුව. ඉතින් මේ දෙන්නගේ අහඹු හමුවීමෙන් පසු හිත් වල ආදරේ මල්ඵල ගැන්වුනාට ඒක වැඩිදුර අරගෙන යන්න මේ දෙන්නට ලේසි වෙන්නේ නෑ. මොකද මෙයාලා ආගම් දෙකක වීමත් ඒකට එක හේතුවක් උනා. ඉතින් මේ සුන්දර ආදර අන්දරය ඔයාලට ඇස් වලින් කඳුළු බේරී බේරී බලාගන්න පුළුවන් වේවි චිත්රපටය අරගෙන බලද්දී. කතාව ගැන මං මීට එහා කියන්න යන්නේ නෑ. හැබැයි අර උඩ සඳහන් කරා නේද කෙදර්නාත් පුදබිම කියල තැනක්. අන්න ඒක ගැන පොඩ්ඩක් කියල ඉන්නම්.
කෙදර්නාත් පුදබිම, එහෙමත් නැත්නම් කෙදර්නාත් මන්දිරය හිමාලයේ කෙදාර් නිම්නයේ තමයි පිහිටලා තියෙන්නේ. මුහුදු මට්ටමේ ඉදන් මීටර් 3583ක් තරම් උසින් පිහිටි ස්ථානයක පිහිටා ඇති මේ පුදබිම, කඳු පංති වලට අමතරව එක් ග්ලැසියරයකින් තමයි වටවෙලා තියෙන්නේ. හරියටම කෙදර්නාත් පුදබිමට උතුරු දෙසින් වෙන්නට. චෝරාබාරි නමින් නිවුන් ග්ලැසියර දෙකක් පිහිටලා තියෙනවා. ඉතින් මේ ග්ලැසියර දෙකෙන් දියවෙලා එන වතුර, කෙදර්නාත් නිම්නය හරහා සරස්වතී සහ මණ්දාකිණි නදී ලෙසින් ගලා බසිනවා. ඊට අමතරව මේ ග්ලැසියරයෙන් දියවන වතුර එකතු වෙලා විශාල වතුර විලක්ද මේ ප්රදේශයේ ස්වභාවිකව පවතිනවා. ඉතින් පහල ඡායාරූපයෙන් ඔබට පෙනෙනවා ඇති මේ ස්ථානය කොතරම් සුන්දර වුවත් භූගෝලියව කොතරම් අවධානම් සහගත තැනකද පිහිටලා තියෙන්නේ කියලා.
ඉතින් උඩ විස්තර කරලා තියෙන ජිවිත දහස් ගණනක් බිලිගත් ගංවතුර හටගත්තේ මෙන්න මේ ප්රදේශයට දින ගණනාවක් තිස්සේ එක දිගට ඇතිවුණු වර්ෂාවත් එක්ක. සරස්වතී සහ මන්දාකිණි ගංගාවන්වල වතුර මට්ටම් ඉහල යාමෙන් සහ අර ග්ලැසියර මධ්යයේ පිහිටලා තියෙන චෝර්බාන් විල කඩාගෙන පහලට පැමිණීමෙන් මුළු කෙදර්නාත් ප්රදේශයම වතුරෙන් යට වූවා පමණක් නොව, ගස් ගල් මුල් සමගින් පැයට කි.මී. 40ක පමණ වේගයෙන් පහලට ගසාගෙන එන්නට වූවා. ඒ මේ ප්රදේශයේ වාසය කරපු මිනිස්සු සහ කෙදර්නාත් වැඳ පුදාගන්න ගියපු බැතිමතුන්ද සමගින්.
කෙදර්නාත් වැඳ පුදා ගන්න එන බැතිමතුන් හට මහා මාර්ගය ඔස්සේ ගෞරිකන්ද් දක්වා පැමිණ, එතැන් සිට කිලෝමීටර් 14ක දුරක් කඳු පල්ලම් ගල් මුල් පසු කරන් පාද යාත්රාවේ පැමිණෙන්නට සිදුවනවා. සල්ලිකාර මිනිස්සුන්ට නම් හෙලිකොප්ටරයක් කුලියට අරගෙන මන්දිරයට යන්නත් පහසුකම නැතුවාම නොවේ. ගෞරිකන්ද් සිට කෙදර්නාත් යන අතරමග හරි මධ්යයේ රාම්බාඩා නමින් කුඩා ගමක් පිහිටලා තියෙනවා. එතනින් එහාට කෙදර්නාත් කරා යන මගෙහි දෙපස සුළඟ තරමක් රළු වන අතර, දෙවියන්ගේ ආශිර්වාදය වෙනුවෙන් එහි පියනගන බැතිමතුන් හට එය කිසිදු බාධවක් එල්ල කරන්නේ නැති බව එහි දිනපතා වන්දනාමාන කරන බැතිමතුන් සංඛ්යාව දුටුවම නිර්ණය කරගන්න පුළුවන්. ඉන්දියාවේ පවිත්රම ශුද්ධ භූමියන්ගෙන් එකක් ලෙස සලකන මේ කෙදරනාත් පුදබිම හට දිනකට ලක්ෂ ගණනින් බැතිමතුන් පැමිණෙන අතර කෙදර්නාත් වැඳ පුදාගන්න උතුරු ඉන්දියාවට පැමිණෙන බැතිමතුන්, ආපු වන්දනාව අපෙතේ නොයන්න කෙදර්නාත් වලට අමතරව ගංගෝත්රි, යමුනෝත්රි වගේම බද්රිනාත් පුදබිම්ද වැඳ පුදාගෙන යන්නට ද අමතක කරන්නේ නෑ. ශිව දෙවියන්ගේ ඇල්ම බැල්ම පවතිනවා යයි සැලකෙන මේ භූමියට කෙදර්නාත් කියන්නේ “කෙදර් කන්දට අධිපති දෙවියන්” යන අර්ථයෙන්. කෙදර්නාත් කෝවිල ගැන ඔබට තවත් තොරතුරු බලාගන්න පුළුවන් එය ගැන ලියවිලා තියෙන විකිපීඩියා පිටුවට ගියොත්.
– කෙදර්නාත් කෝවිල –
ඉතින් මේ භූමියේ එවකට සිදුවූ සුන්දර ආදර කතාවක් අලෙලා සිනමාපටයක් නිර්මාණය කරන්නට Rock On, Fitoor, Kai Po Che අධ්යක්ෂක Abhishek Kapoor මහත්මයට ඕන වෙනවා. සුප්රකට RSVP Movies සමාගමත් එක්කාසු කරගෙන අභිෂේක් 2017 වසරේ මැද බාගයේ වැඩේට බැස්සේ ඔහුගේ Kai Po Che චිත්රපටයෙන් බොලිවුඩ් සිනමාවට දායාද කරපු ඒ දක්ෂයා සුශාන්ත් සිං රාජ්පුත් සමගින් සයිෆ් අලි කාන්ගේ දියණිය, සුරූපී සාරා අලි කාන් ද එක්කාසු කර ගනිමින්. නමුත් වැඩේ හිතන තරම් ලේසි වුනේ නෑ. මේ චිත්රපටියට විරුද්ධව දිගට හරහට නඩු වැටෙන්නට ගත්තා. ඉතින් මේ බාධක හැම එකක් හින්දම 2018 ජුනි මාසේ නිකුත් කරන්නට සිටි මේ චිත්රපටිය දවසින් දවස කල් යන්නට ගත්තා. අන්තිමේ හැම දේම විසඳගෙන පහුගිය වසරේ දෙසැම්බර් 7 මිනිත්තු 117 කින් යුත් කෙදර්නාත් චිත්රපටය සිනමාලෝලීන් හට විවර වන්නේ ඉන්දියානු රුපියල් කෝටි 60ක නිෂ්පාදන වියදමකින්. Amit Trivedi සංගීත අධ්යක්ෂණයෙන් ඔබේ දෙසවන් වෙත සුන්දර ගීත කිහිපයක්ද ත්යාග කරමින් තිරගත වූ මෙම චිත්රපටය ඉන්දියානු රුපියල් කෝටි 96 ක ආදායමකට හිමිකම් කීමට සමත් වනවා.
ඉතින් පහුගිය දවසක මේ චිත්රපටයට හොඳ පිටපතක් නිකුත් වූවා. නමුත් හරිහමන් ඉංග්රීසි උපසිරසියක් නිකුත් වූයේ නැති නිසා අහගෙන කරන්න කියලා සිසිල සහෝදරයගෙන් ඉල්ලීමක් ලැබුණා. ඇත්තටම මේක එතුමා උපසිරැසි කරන්න බලන් හිටිය චිත්රපටියක්. කෙසේ හෝ තරිඳු රුක්ෂාන් අයියට කියල ලයින් ටික හදවගෙන සබ් එක කරගෙන යනකොටම ඔන්න ඉංග්රීසි උපසිරැසියක් නිකුත් වූ පුවත සිසිල සහෝම මට අරන් එනවා. ඉතින් ඒකත් අරගෙන එන්ජිම ඊළඟ ජියර් එකට දාගෙන වැඩේ ඉවරයක් කරලා තමයි මේ ඔයගොල්ලා හමුවට එන්නේ.
මුලින්ම ස්තුතිවෙන්න ඕන සිසිල සහෝදරයට චිත්රපටයට වගේම ඉහතින් දැක්වෙන කෙදර්නාත් ගංවතුර පිලිබඳ දීර්ඝ, විස්තරාත්මක, ලස්සන ලිපිය මා හට ලබා දුන්නාට. ඒ වගේම තරිඳු අයියටත් ස්තුතියි කියපු සැනින් ලයින් ටික ගහල දෙන්න ඔට්ටු උනාට. මේ හැමෝගෙම කරපිටින් තමයි ඔයාලට අද මේ ලස්සන චිත්රපටය අරගෙන එන්නේ. රේටින්, රිවීව්ස් එහෙම බලලා “හා.. පෝ.. මෙලෝ රහක් නැතුව ඇති” කියල හිතෙනවනම් හිතාගන්න ඒ ඔබේ කරුමේ තමා කියලා. ඔබ ඕනෑතරම් චිත්රපටි දැකල ඇති, බලලා ඇති. ඒත් මේ වගේ ලොකේෂන් එකක් තියෙන චිත්රපටයක් නරඹද්දී හිතට දැනෙන සැහැල්ලුව ඔය රේටින් වලින් මනින්න බෑ. ඒ වගේම කතාවත් කාටවත් අහක දාන්න බැහැ. අවසානය වනවිට අපිව හැඟීම්බර කරන්න කරන්නට තරම් මෙහි කතාව සහ සිනමාකරණය දක්ෂ වනවා. එහෙනම් තවමත් වැඩක් නෑ කියල හිතන අය සිටි නම් කරන්නට දෙයක් නෑ. එවුන්ගේ නම් කරුමේම තමයි.
එහෙනම් අපි විසි වෙනවා. හැකි ඉක්මනින් ආයෙත් හම්බවෙමු. අවසාන වශයෙන් ඇඩ්මින් මඩුල්ල ඇතුළු බයිස්කෝප් සෙට් එකේ හැමෝමටමත්, බයිස්කෝප් අඩවියට දිනපතා එන යන ඔබ සැමටත් සම්මා සම්බුදු සරණ පතමින් මං සමුගන්නවා. යනගමන් ඔය හිතේ තියෙන දෙයක් හලාගෙන ගියාටත් කමක් නෑ. ජයෙන් ජය…!!!
Due to copyright issues, we do not provide any torrent link.
මෙම ලබා දී ඇති උපසිරසි HDRip පිටපත් සඳහා වලංගු වේ.
සිංහල උපසිරැසි මෙතනින් බාගන්නSInhala Subtitles
-- Count 14325 --
[author]
මේ ලබා දී ඇති සිංහල උපසිරැසි පිළිබද “තාරක නුවන් දිල්හාර” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.[/author]
Subtitle Contributor Rank
SILVER MEMBER
JOINING DATE – 2014-11-10
SUBMAKER RATING BY ADMINS
[box]
ඉහත තරු මගින් පෙන්නුම් කෙරෙන්නේ උපසිරසිකරුවන් මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්රිය චිත්රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්රතිපලයකි.
[/box]
thanks a lot saho sub ekata